झन्डै डेढ दशकदेखि निरन्तर लोकगीत गाएर लोकप्रियता कमाएकी पूर्णकला विसीले कोरोना कहर अगावै ५ हजार गीतमा स्वर भरिसकेकी छन । गुलरिया नगरपालिका वडा नम्बर १ बर्दिया जिल्लामा जन्मिएकी विसी नाममा मात्रै होईन कलामा पनि पूर्ण छिन । उनी आफ्नो नामलाई अर्थपूर्ण बनाउँदै पूर्णकलालाई सार्थकता तुल्याउन सफल भएकी छन । सानैदेखि लोकगीतलाई मन पराउने विसीले आफ्नो लोकप्रियतालाई कुनै पनि हालतमा कमि आउन दिएकी छैनन् । क्यासेट, डीभीडी, पीआरबीटी सीआरबीटी हुँदै युट्युबको डीजीटल जमानाको बजारमा पनि उत्तिकै लोकोप्रियता बटुल्न सफल गायिका पूर्णकलाले समय र परिवेश अनुसार आफुलाई परिमार्जित गर्दै लगेकी छन । प्रस्तुत छ उनै लोकदोहोरी गायिका विसीसँग दर्पण दैनिकका लागि केशर विश्वकर्माले गरेको छोटो कुराकानीको सम्पादित अश:

पूर्णकला जी अहिलेसम्म कति गीत गाउनु भयो ?

कोरोना भाइरस आउनुभन्दा अगाडि पाँच हजारभन्दा बढी गीत गाएको छु । त्यसपछि कति गीत गाएँ भनेर ठ्याक्कै याद छैन । टिपेर पनि राखेकी छैन । समग्रमा पाँच हजारभन्दा बढी गीतहरु गाएको छु । मेरो आफ्नै सिर्जना चाही चारपाँचवटा छन । बाँकी सबै सर्जक स्रस्टाकै गाएकी हुँ ।

एउटा गीत गाएबापत कति रकम लिनुहुन्छ ?

रकम प्रोजेक्ट अनुसार लिने गरेकी छु । गीत गाएबापत यति नै रकम लिनुपर्छ या दिनुपर्छ भन्ने ठ्याक्कै रेट चाँही तोकिएको हुँदैन र छैन पनि । बाँच्नका लागि सरदरमा पाँच हजारदेखि माथि लिने गरेको छु । ठुलै प्रोजेक्ट छ भने अलि बढी नै रकम लिएर पनि गाउने गरेको छु । कतिपय अवस्थामा गीतसंगितमा रुचि भएका तर आर्थिक समस्या भएका सर्जक स्रस्टाहरुको चाँही कति पनि रकम नै नलिएर गाएको छु र गाउनुपर्ने अवस्था पनि आउँछ । कहिलेकाहीँ आफैले भाडा हालेर पनि गाएको छु । समग्रमा मानवीयताको हिसाबले गाउने गर्छु र गाउनुपर्छ पनि ।

सांगीतिक क्षेत्रमा कहिलेबाट लाग्नुभयो ?

२०६५ सालमा काठमाडौ भित्रिएँ । २०६६ सालबाट लोकगीत क्षेत्रमा प्रवेश गरियो । त्यसपछि २०६७ सालबाट गीत गाउन सुरु गरेँ ।

तपाईंको पारिवारिक पृष्ठभुमि लोकगीत संगीतकै हो ?

हामी नितान्त गाउँको मान्छे हौं । गाउँकै भएको कारण लोकगीतसंगितलाई चाँही एकदम रुचाउने गरिन्थ्यो । मेरो बुवा आफैमा मिठो स्वरको धनी हुनुहुन्थ्यो र लोक गीत राम्रो गाउनु पनि हुन्थ्यो । बुवाको त्यो गुण म र भाईबहिनीमा पनि आएको छ । मेरा भाइबहिनी पनि राम्रै गाउँछन् । त्यसैले मेरो परिवार लोकगीत संगीत तिर नै लक्षित हुनुहुन्छ ।

पछिल्लो समयमा भाईरल बन्नका लागि विभिन्न तिकदम अपनाउँछन नि ?

त्यो भनेको कस्तो हाे भने लोकप्रियतालाई भन्दा पनि भाइरललाई नै दर्शक स्रोताले रुचाईदिएको कारण भाइरल झन भाइरल भएको हो । तर वास्तविकता चाँही कहाँनेर आएर झल्किन्छ भने हाम्रो लोक संस्कृति केमा छ, कहाँ छ, हामी लोकप्रियता कसरी हुन्छौं, दिगो कसरी रहिरहन्छौँ, हिजोको दिनदेखि वर्तमान र भविष्यका दिनसम्म उत्तिकै चलायमान कसरी भइरहन्छौँ लगायतका कुरालाई प्रत्येक कलाकारले मध्यनजर राख्नुपर्छ । आज आउने अनि भोलि हराउने खालको हुनुभएन । वर्तमानदेखि भविष्यसम्म कसरी दर्शक स्रोताको मन मस्तिष्कमा बस्न सकिन्छ भन्नेतर्फ पनि ध्यान दिन उत्तिकै जरुरी छ ।

पछिल्लो समय भाइरल हुनका लागि विविध खालका क्रियाकलापको प्रस्तुतिकरणले गर्दा याे क्षेत्र केही हदसम्म फितलो भएको भने पक्कै पनि हो । हामीलाई प्रश्न तेर्साउनुको कारण पनि यही हो । म चाँही के भन्छु भने आफ्नो स्ट्यान्डर्ड कसरी मेन्टेन्ड गर्ने, म को हुँ, ममा के कस्तो प्रतिभा छ, मेरो इज्जत कहाँसम्म छ, मैले याे क्षेत्रकाे इज्जत राख्नुपर्छ भन्ने कुरा जबसम्म कलाकार तथा सर्जकस्रस्टाले बुझ्दैनन तबसम्म यस्ता खालका विकृति विसङगति रहिरहन्छ । भाइरल हुनु राम्रो कुरा होइन । हिजोका भाइरलहरु आज लाइट लगाएर खोज्नुपर्छ । त्यसैले भाइरल हुने तिर होइन आफुमा भएको प्रतिभालाई निरन्तरता दिनुपर्छ र जोगाएर राख्नुपर्छ ।

चुनौतीहरु कत्तिको छ नि ?

चुनौती हरेक क्षेत्रमा छन । जसले चुनौतीलाई अगाँल्दै सहज ढंगबाट पार गर्छ त्यो नै उसको जीत हो ।

भावी पुस्तालाई के भन्नुहुन्छ ?

मलाई लाग्छ पछिल्लो समयमा प्रतिभा भएका मान्छेलाई अगाडि बढ्नका लागि हाम्रो समयमा जस्तो गार्‍हो छैन । किनभने विभिन्न खालका रियालिटी ‌शो हरु छन, स्टेज प्रोग्रामहरु छन । त्यसमा प्रतिस्पर्धा चलिरहेका छन् । त्यस्तै आफ्नो प्रतिभाहरु देखाउने अन्य धेरै प्लेट फर्महरु छन । जस्तैः टिकटक, फेसबुक लगायतका सामाजिक संजालहरु छन । सामाजिक संजाल यस्तो चिज हो आफ्नो प्रतिभालाई टपक्कै टिपेर उजागर गर्ने ठाँउ हो । अहिले त लुकाएर पनि लुक्दैन ।

तपाँईंको बुझाईमा लोकगीतसंगीत के हो ?

लोकगीतसंगीत भनेको आमा हो । जननी हो । आमालाई हामीले उदाङ्ग पार्नु हुँदैन । लोकगीतसंगीत हाम्रो देशको माटो हो । त्यसैले यसलाई बचाएर राख्नुपर्छ ।